Na súa primeira tempada á fronte do banquiño vilagarcián, Pepe Vázquez enfoca o derbi do sábado co Arxil cun ollo en Pontevedra e o outro en Huelva, pensando xa na fase de ascenso que agarda en dúas semanas.
-A fase de ascenso está asegurada, pero para o Thetrend Cortegada a Liga regular non rematará ata o sábado. Do que pase na derradeira xornada depende que o equipo finalice campión, segundo, terceiro ou mesmo cuarto clasificado…
-Si. Nese sentido, imos tentar ser fieis á nosa preparación de cara a fase. Esta foi unha semana de carga de traballo, para chegar á vindeira máis descargados. De aí tamén que vaiamos repartir os minutos. Imos usar o partido desta fin de semana para non perder o noso nivel competitivo, pero sen priorizar o resultado.
-Entón, o partido do sábado co Arxil é un mero trámite…
-Non, non. Pero dámoslle a importancia xusta e necesaria. Un pouco da mesma maneira na que afrontamos o partido contra o Carmelitas, só que daquela viñamos dunha semana de descarga, dando o máximo de nós. Xa que o equipo conseguíu clasificarse para a fase con case 25 días de antelación, queremos aproveitalo para chegar a Huelva nas mellores condicións posibles. Pero este equipo xa demostrou que non sae nin a un só partido a non gañar. -En casos coma este ¿que pesa máis, ese desexo de saír sempre a gañar, ou reservar a tropa para evitar disgustos de última hora de cara a fase?
-Eu creo que na balanza pesa igual. A fin de semana pasada tamén quixemos dosificar minutos, e puidemos competir da mesma forma. Dou a cara por este equipo a nivel competitivo. Quitando o encontro de Bembibre, competimos sen ter en conta nunca o resultado. E por brindarlle unha vitoria á afección fronte ao Arxil, as xogadoras van estar ao máximo. Pero sempre pensando en que as xogadoras estean a tope para o día 10 de maio.
-Sobre o papel, o derbi Lérez-Arousa semella ter unha única cor. Na primeira volta endosáronlle ao Arxil un 79-61…
-Si. Si. Bueno. Elas -o Arxil- tampouco se xogan nada. Non poden nin subir nin baixar un só posto na clasificación. Imaxino que o afrontarán coma unha despedida, e quererán repartir minutos entre todo o plantel. Nese punto, estaremos igualados no enfoque, desde os nosos respectivos puntos de partida.
Fuente: La Voz de Galicia. Edición de Arousa
Foto: M.Irago