“Non teño talentos especiais, pero si son profundamente curioso.”
Albert Einstein
Nos centros educativos debería primar a curiosidade como medio de alcanzar o coñecemento, e o desenvolvemento das cualidades e capacidades do alumnado para poder aproveitar o aprendido; Miguel Ángel González Estévez era desa opinión e nesa confianza creou unha estrutura educativa que se chamaba Instituto de Carril, a súa fe nas habilidades do alumnado foi quen de facer dun centro educativo convencional, o centro referente da cultura e as artes, do intercambio coa sociedade e da aprendizaxe activa.
O alumnado tiña exposicións regulares nunha sala do seu centro, polo que pasaron artistas de sona, facíase teatro que saía dos muros do centro e viaxaba a outros salóns de actos galegos, potenciábase a actividade musical dando cabida a grupos de todos os xéneros, chegando a crear un festival de música folk de ámbito autonómico para darlle visibilidade; sen esquecerse do deporte feminino, impulsado polo equipo de Miguel e do que, co seu esforzo persoal, xurdiu o Inelga, xermolo do actual Cortegada.
Saíron das súas mans deseños de moda, cancións, libros e todo tipo de artes e artistas que hoxe teñen un oco na sociedade, aínda que haxa xente que non os recoñeza coma tal. Por estes e outros milleiros de motivos, por ser inspiración e exemplo, foi polo que se levou a cabo unha mobilización popular que desexaba inmortalizar o seu traballo dándolle o seu nome ao centro ao que lle dedicou a súa vida, o instituto de carril, si, Instituto de Carril, que ninguén renega do lugar de ubicación do centro, pero tal ubicación non a vai perder xamais, e por unha falsa practicidade, hoxe perdeu o nome que merecía aquel que foi a casa acolledora de moita xente que se veu inspirada pola paixón de Miguel.
Repensen a súa decisión e miren a sociedade que os rodea e que non debe, nin quere, perder de vista o referente que foi Miguel Ángel.
Esa Comunidade escolar debería sentirse orgullosa de lucir na porta o nome dunha gran persoa e sobre todo aprender que non se debe esquecer a historia que lles deu forma; talvez no canto de cambiarlle o nome deberían pensar na divulgación dos seus feitos para que ninguén, e as persoas que forman o claustro menos, esqueza que a docencia precisa de paixón e curiosidade.
Un texto de Andrea Fdez. Maneiro (poeta)
Dende a Agrupación Deportiva Cortegada queremos aportar o noso granito de area para conseguir que non se cambie o nome do IES Miguel Ángel González Estévez. Por iso, unímonos a unha iniciativa que se iniciou por parte dalgunhas institucións e ex alumnos de Miguel e creamos un Change.org para recoller firmas. Por iso, animámosvos a todos a que nos axudedes cas vosas firmas. Queremos levalas ó Pleno do Concello de Vilagarcía no que se debatirá sobre este tema .
Compartimos ó enlace da petición: https://chng.it/Jkd6K7jWvR
ASINADO:
- Leixapén
- Asociación Cultural Malveiras
- Mar Barral (ceramista)
- Franco Quintáns (Deseñador de moda e “Dedal de oro, 2014.
- Andrea Fdez. Maneiro (poeta)
- Manuel Riveiro (músico e compositor)
- Álex Vazquez (pintor)
- Juan carlos Platis (pintor)
- Carmen Cuervo Martinez (Pintora, musico, escritora e Dir.ª de arte)
- Enma Casteñeiras Martínez (pintora, musico e Dir.ª de arte)
- Agrupación Deportiva Cortegada
- CLB